Asteazkenean, talogintzaren inguruko ekintza zoragarri bat burutu genuen Agape Elkartean.

Jose Luis Otaegik, mailako aitak, proposamen interesgarri bat luzatu zigun eta Irune Lekuonaren laguntzaz, hau ere mailako ama, ekintza zoragarri bat eskaini ziguten. Goizean, ikastolan, taloaren inguruko saiotxo bat burutu genuen ekintza girotzeko eta gaiaren inguruan oinarrizko ezagutza batzuk partekatzeko. Arratsaldean, hitzordua Agape Elkartean genuen eta fin-fin hantxe aurkeztu ginen ia 80 lagunez osatutako taldea. Bi txandatan antolatuta zegoenez, erdia sartu zen bitartean, beste erdia kanpoko plazan jolasean gelditu zen. Bigarren txandan, noski, alderantziz.

Ikustekoa izan zen ikasleek jarritako arreta eta gaiak piztu zien interesa. Baina, zalantzarik gabe, ikusgarriena eurek eginiko taloak jatean hartu zuten gozatua eta erakutsi zuten irribarrea izan zen. Une horiek ezin izan genituen gure kamerarekin jaso beste zereginetan ari ginelako, baina aurretik hartutako irudiek garbi erakusten dute arestian esandakoa.