Lehen hiruhilabete honetan, “Orian barrena” izeneko egitasmoa burutzen ari gara eta, noski, uraren gaiak egundoko garrantzia hartzen du gure zereginetan.

Esan genizuen bezala, asteartean Arriarango urtegia eta araztegia bisitatzen izan ginen. Eguraldia oso ongi portatu ez bazen ere, oso irteera interesgarria suertatu zitzaigun eta ikastolan landutakoa bertatik bertara ikusteko aukera izateak, asko lagundu zigun ideia garrantzitsuenak hobeto barneratzen.

Bada, hori gutxi balitz, gure Mikel Telleriaren aita den Joxemi Telleria ikastolara ekarri genuen ostegunean hitzaldi bat ematera. Gipuzkoako Ur Kontsortzioan lan egiten du eta aditua da gai hauetan.

Oso hitzaldi interesgarria eskaini zigun eta gelditzen zitzaizkigun zalantza asko argitzeko oso ona izan zen. Gainera, zenbait momentuetan, pazientzia handia izan zuen guk ateratzen genuen zaratarekin eta oso jator aritu zen. Bukaeran, guztioi oparitxo bana eman ondoren, gurekin erabilitako aurkezpena ere utzi zigun hemen argitaratzeko.

Hitzaldia bideoan grabatu genuenez eta argazki batzuk atera genituenez, hortxe dituzue biak zuek ere ikas dezazuen.